AfriForum het vanjaar 135 vullisterreine landwyd geoudit as deel van die organisasie se nasionale projek om die gehalte van vullisterreine in Suid-Afrika te meet.
Slegs 8 van die 19 vullisterreine wat in die Wes-Kaap geoudit is, het aan nasionale standaarde voldoen. Kragtens toepaslike wetgewing en regulasies, waaronder die Wet op Nasionale Omgewingsbestuur: Vullis (Wet no. 59 van 2008), moet ’n vullisterrein aan bepaalde vereistes voldoen.
Só vergelyk die vullisterreine in die Wes-Kaap:
| Naam van tak/vullisterrein | Munisipaliteit/ verantwoordelike instelling | Lisensienommer | Nakomingstelling (%) | ||||||
| Wes-Kaap: | 2015 | 2016 | 2017 | 2018 | 2019 | 2020 | |||
| Bellville | Stad Kaapstad Metro | 19/2/5/4/A5/6/WL0050/12 | 80 | – | 80 | 97 | – | 90 | |
| Bredasdorp | Kaap Agulhas PM | 16/2/7/G501/D1/Z1/P329 | – | – | – | – | – | 46 | |
| Gansbaai | Overstrand PM | 16/2/7/G400/D24/21/P335 | – | 96 | – | – | – | 86 | |
| George | George PM | WL0683/4 | – | 52 | 41 | 52 | 52 | 44 | |
| Gordonsbaai (Oorlaaistasie) | Stad Kaapstad Metro | – | – | – | – | – | 96 | – | |
| Hermanus | Overstrand PM | 16/2/7/G501/D3/Z3/P374 | 92 | 88 | 100 | 100 | – | 86 | |
| Stilbaai | Hessequa PM | 19/2/5/1/D/11/WL0060/14 | – | – | 62 | 38 | – | 72 | |
| Klawer | Matzikama PM | 19/2/5/4/F3/6/WL0042/19 | 60 | 44 | 43 | – | – | 24 | |
| Lutzville | Matzikama PM | 19/2/5/4/F3/10/WL0006/18 | – | 36 | 44 | – | – | 22 | |
| Mosselbaai | Mosselbaai PM | 19/2/5/1/D6/17/WL0084/14 | – | 64 | 80 | – | 68 | 96 | |
| Malmesbury (Highlands) | Swartland PM | B/33/2/720/132/P67 | – | – | – | – | 96 | 94 | |
| Malmesbury (Chatsworth) | Swartland PM | B33/2/900/3/5/P167 | – | – | – | – | – | 80 | |
| Oudtshoorn | Oudtshoorn PM | B33/2/900/3/5/P167 | 40 | 32 | 0 | 26 | 38 | 48 | |
| Riversdal | Hessequa PM | – | – | – | – | 84 | – | – | |
| Stellenbosch | Stellenbosch PM | 16/2/7/G203/D16/21/P331 | – | – | – | 89 | 66 | 96 | |
| Kraaifontein Interwaste Management Facility | Richardo Cheemee | 12/9/11/P124 | – | – | – | – | 98 | 98 | |
| Velddrif | Bergrivier PM | – | – | – | – | 69 | 26 | 48 | |
| Vredendal | Matzikama PM | 19/2/5/4/F3/17/WL0032/18 | – | 28 | 53 | – | – | 74 | |
| Vanrhynsdorp | Matzikama PM | 19/2/5/4/F3/16/WL0044/18 | – | 68 | 73 | – | – | 54 | |
| Wellington | Drakenstein PM | – | – | – | – | 68 | 80 | 68 | |
| Worcester | Breede Valley PM | – | – | – | – | – | – | 70 | |
Die oudit bestaan uit ’n lys van 33 vrae wat die minimum vereistes vir vullisterreine in Suid-Afrika meet en sluit faktore soos toegangsbeheer, brande, mediese afval, omheining, rehabilitasie en dies meer in. ’n Vullisterrein moet minstens 80% behaal om aan wetgewing te voldoen.
Volgens Johardt van Heerden, AfriForum se distrikskoördineerder vir die Boland, is die meeste vullisterreine in die Wes-Kaap in ’n haglike toestand. “Die meeste vullisterreine is in ’n slegte toestand en dit kan hoofsaaklik toegeskryf word aan ’n gebrek aan politieke wilsbesluite by sekere munisipaliteite. Die terreine wat wel baie goeie resultate behaal het, is ’n bewys dat politieke wilskrag op grondvlak wel ’n groot rol speel en dat onvoldoende fondse nie altyd as ’n verskoning vir swak resultate gebruik kan word nie.”
Van Heerden sê voorts die algemeenste probleme wat AfriForum tydens die oudit ondervind het, is onder meer die afwesigheid van afvalbestuurslisensies en die algehele wanbestuur van die terreine. “Vullis wat rondwaai en swak na geen toegangsbeheer is verdere knelpunte by die meeste terreine.”
AfriForum-takke sal ook druk op owerhede in hul gebiede plaas om afvalmoniteringskomitees te stig om die afvalbestuursproses te verbeter. Dié komitees sal bestaan uit munisipaliteite en belanghebbende partye wat vullisbestuur in die betrokke dorp wil verbeter. AfriForum gaan ook ná afloop van die projek ’n vergadering met Barbara Creecy, Minister van Omgewingsake, belê om terreine te identifiseer sodat dit herstel en weer op peil gebring kan word.
Die ouditverslag sal ook aan die Groen Skerpioene oorhandig word vir verdere ondersoek en optrede teen munisipaliteite wat nie aan die vereistes voldoen nie. AfriForum sal die proses deurlopend moniteer om te verseker dat die vullisterreine se standaard genoegsaam verbeter.
- Lees die volledige verslag hier.
