AfriForum se Edenvale-tak het op 19 Junie 2021 ’n skoonmaakprojek afgeskop. Die projek het by die Margaret-brug in Illiondale plaasgevind. Die rommel rondom die brug en spruit was vir ’n geruime tyd ’n seeroog en daarom het AfriForum besluit om in te spring en skoon te maak.
“Hierdie soort projekte word van stapel gestuur om op ’n proaktiewe manier die gemeenskap te bevorder en ook te verseker dat ’n natuurlike kenmerk, soos die spruit, in ’n beter toestand as voorheen gelaat word,” sê Dewet Ungerer, AfriForum se distrikskoördineerder vir die Oos-Rand.
Volgens Ungerer is dit een van vele skoonmaakprojekte wat rondom die spruit in Edenvale gaan plaasvind. AfriForum se veg-en-bou-strategie sluit in dat die regering verantwoordbaar gehou word en druk toegepas word sodat hulle dié tipe werk moet doen, maar ook om self gemeenskappe se omgewing skoon te maak dat hulle nie vir die regering hoef te wag om sy verantwoordelikhede na te kom nie.
Maak vandag nog ’n daadwerklike verskil in jou omgewing en gemeenskap. Raak by jou plaaslike AfriForum-tak betrokke deur ’n e-pos te stuur aan dewet.ungerer@antiek.afriforum.co.za.
