Op 20 Maart 2019 is getuienis in die geregtelike ondersoek na die dood van Reshall Jimmy in die Wes-Kaapse hoë hof voortgesit. Adv. Gerrie Nel, hoof van AfriForum se privaatvervolgingseenheid, het namens die Jimmy-gesin verskyn. Jimmy is in Desember 2015 oorlede toe die Ford Kuga wat hy bestuur het aan die brand geslaan het. Die Ford-motormaatskappy is ook ’n party tot die verrigtinge. Dié ondersoek sal bepaal of Jimmy se dood veroorsaak is deur enige daad of weglating rakende of beduidend van ’n misdryf deur Ford.
Lt.kol. Richard Tonkin van die eenheid vir ernstige en gewelddadige misdade, wat ook op die toneel was, het sy getuienis van die vorige dag voortgesit. ’n Noemenswaardige stelling van sy getuienis op 20 Maart was dat Ford-verteenwoordigers die ondersoek van een van sy vooraanstaande speurders ondermyn het.
Tonkin is gevra vir sy opinie oor die tersaaklike vraag na waarom Jimmy nie sy voertuig verlaat het toe die brand ontstaan het nie. Tonkin het vermeld dat, in sy opinie, verskeie faktore die oorledene kon verswak, disoriënteer of belemmer. Sulke faktore kon byvoorbeeld die brand van materiaaldele van die voertuig (soos plastiek) insluit, waar skadelike walms vrygestel kon word. Tonkin het bygevoeg dat die ongelooflike hitte van die vuur – wat temperature bereik het wat koper kon smelt – ook in ag geneem moet word wanneer daar gepoog word om hierdie vraag te beantwoord.
Die ondersoek duur op Maandag 25 Maart 2019 voort.
Dié saak is ’n belangrike verdere stap in AfriForum se strategie om die beginsel van privaat vervolging te vestig, asook om te verseker dat geregtigheid geskied.
