Die burgerregte-organisasie AfriForum doen ’n beroep op lt.genl. Khela Sitole, nasionale polisiekommissaris, om ’n gesoute polisieman in die vakante pos van Wes-Kaapse polisiekommissaris aan te stel. Ná weke se spekulasie het die nuus vanoggend amptelik gebreek dat lt.genl. Kombinkosi Jula na KwaZulu-Natal verplaas is.
“Ons versoek ’n bekwame beroepsbeampte wat die Wes-Kaap, die mense en die unieke misdaadkrisis hier verstaan,” sê Johandré van Zyl, AfriForum se veiligheidshoof vir die suidstreek.
Verskeie sektore van die samelewing het ’n ernstige tekort aan polisiebetrokkenheid – landelike gebiede, bendegeteisterde gebiede en selfs die toerismesektor van die Wes-Kaap gaan onder geweldmisdaad gebuk. Daarom vereis die provinsie ’n persoon wat die druk wat met die posisie gepaardgaan, kan hanteer.
“Die Wes-Kaap het ’n leier nodig wat erken dat die polisie nie die misdaadkrisis alleen kan hanteer nie en wat alle rolspelers by misdaadbekamping sal betrek,” sluit Van Zyl af.