AfriForum het op Peter Dutton, die Australiese minister van binnelandse sake, se kommentaar vanoggend dat Suid-Afrikaanse boere se aansoeke om na Australië te immigreer moontlik prioriteitsaandag sal geniet, gereageer deur te sê dat dit ’n ernstige aanklag teen die Suid-Afrikaanse regering is.
Volgens Alana Bailey, adjunk- uitvoerende hoof van AfriForum verantwoordelik vir internasionale skakeling, neem die Australiese minister duidelik kwessies soos die hoë voorkoms van plaasaanvalle, misdaadstatistiek en die regering se stappe om onteiening sonder vergoeding moontlik te maak ernstig op, terwyl die Suid-Afrikaanse regering die kwessies bloot ignoreer of as ongegronde vrese afmaak.
“Verder erken hy skynbaar ook dat die kommer van wit Suid-Afrikaners net so geldig soos dié van enige ander landsburger is, terwyl die Suid-Afrikaanse owerhede alte graag die gemeenskap as sondebokke vir probleme in die land voorhou en hulle soos tweedeklasburgers behandel,” sê Bailey.
Bailey meen die minister, as verteenwoordiger van ’n suksesvolle internasionale demokrasie, se houding behoort stof tot nadenke vir die regering te wees.
“Dit moet as waarskuwing dien dat Suid-Afrika die gevaar loop om nog meer produktiewe, lojale burgers te verloor as daar nie met erns na hul kommer oor kwessies soos eiendomsregte geluister word en daadwerklike aksies geloods word om probleme soos misdaad in die land aan te pak nie.”
AfriForum se standpunt bly dat oplossings vir die probleme wat Afrikaners en ander minderhede in Suid-Afrika ondervind, gevind moet word en dat ’n toekoms aan die suidpunt van Afrika geskep moet word waarin ook Afrikaners en ander minderhede blywend vry, veilig en voorspoedig kan voortbestaan. Die organisasie verwelkom verder enige internasionale druk wat die uitdagings wat minderhede in die gesig staar in die kollig plaas en die regering help oortuig om dit te prioritiseer.