AfriForum het ’n verslag oor politieke inmenging in Suid-Afrikaanse krieket aan die Internasionale Krieketraad (IKR) voorgelê. Dié verslag is ook vandag tydens ’n mediakonferensie bekend gemaak en toon politieke inmenging in krieket sedert 1998 aan. Die verslag bied ook statistiese bevindinge oor die impak van dié inmenging.
Die doel van die studie, wat deur AfriForum onderneem is, is nie daarop gemik om prestasieverskille tussen rasse uit te lig nie, maar om afgedwingde rassekwotas en die invloed van dié beleid onder die loep te neem. Die streng afdwinging van rassekwotas het tot gevolg dat ras – en nie meriete nie – die verkiesingskriterium geword het en die gehalte van dié sport benadeel.
AfriForum versoek die IKR in hul brief om die praktyke en beleid van Krieket Suid-Afrika (KSA) as ’n oortreding van die IKR-reëls en ‑regulasies te verklaar en te bevind dat KSA onbehoorlike politieke invloed uitoefen. Die organisasie versoek ook dat ’n riglyn aan KSA uitgereik moet word met die uitdruklike opdrag om hul standpunt oor hul spankeusebeleid te hersien.
“Oor die geskiedenis heen was die ideaal van sport nog altyd een van gesonde kompetisie en meritokrasie. Elke atleet ding mee om die beste in hul sportsoort te wees, of om hul plek te verdien in ’n span met die beste spelers. Politieke inmenging in sport is ’n direkte aanval op hierdie eeue-oue ideale, en soos AfriForum se verslag bevind, is KSA hoog op die podium van politieke inmenging in sport,” sê Ernst van Zyl, veldtogbeampte vir strategie en inhoud by AfriForum.
Ronald Peters, AfriForum se bestuurder vir sport, noem dat die agteruitgang van krieket in Suid-Afrika weens politieke inmenging reeds te lank toegelaat word. “Dit is noodsaaklik dat die IKR nou intree en rassediskriminasie en politieke inmenging verbied. Dié inmenging het meer as net ’n negatiewe impak op die standaard van professionele krieket wat plaaslik en op internasionale vlak gespeel word – dit dryf die krieketgemeenskap uitmekaar.”
- Lees die verslag hier.
