Die burgerregte-organisasie AfriForum het vandag ’n voorlegging oor plaasmoorde in Suid-Afrika aan lede van die Wes-Australiese parlement gemaak. Dié voorlegging volg nadat daar vanjaar reeds nagenoeg 346 plaasaanvalle en 46 -moorde aangeteken is, terwyl pres. Cyril Ramaphosa hierdie tragedie ontken.
“Parlementslede is veral geskok oor die feit dat pres. Ramaphosa die bestaan van plaasmoorde in Suid-Afrika ontken ondanks die bewyse wat reeds bestaan, asook die bewyse wat AfriForum vandag verder bekend gestel het,” sê Ian Cameron, AfriForum se hoof van gemeenskapsveiligheid.
Cameron meen Ramaphosa se blatante leuens aan die wêreld neig daartoe dat die Suid-Afrikaanse regering aandadig is tot plaasmoorde en dat die ANC-regering slagoffers van plaasaanvalle en -moorde verneder deur hulle as leuenaars uit te maak.
AfriForum het ook beeldmateriaal van veral pres. Ramaphosa en Julius Malema, leier van die EFF, tydens die voorlegging vertoon om die polariserende klimaat wat al deur hulle veroorsaak is beter te illustreer.
“Ons het vandag se voorlegging opgedra aan elke slagoffer wat al wreed op ’n plaas in Suid-Afrika vermoor is deur Willemientjie Potgieter se verhaal te vertel – sy het op tweejarige ouderdom saam met haar ouers, Attie en Wilna Potgieter, ’n marteldood tydens ’n plaasaanval in die Vrystaat gesterf,” sê Cameron.
“Die twee mees verwoestende kragte in die mensdom is sosialisme en rassisme, en wanneer dit saamgevoeg word, is dit ʼn vreesaanjaende kombinasie.
“Diegene wat besorgd is oor menseregte het ʼn belangrike rol gespeel om apartheid te beëindig. As minderhede dus vandag onderdruk word, het ons ʼn verpligting om ons daarteen uit te spreek,” sê Aaron Stonehouse, Liberale lid van die Wes-Australiese wetgewende raad en LP vir die Liberaal Demokrate.
Parlementslede het aangedui dat hulle sal voortgaan om die saak aan te roer en die boodskap wêreldwyd te ondersteun. Van die lede het dit ook duidelik gemaak dat hulle die veldtog verder in Australië sal dryf.