Die AfriForum-tak in Benoni het op 3 September 2019 10 bome by Willowmoore High geplant as deel van dié burgerregteorganisasie se boomplantmaandprojek.
Volgens Archie Mouyis, AfriForum se Benoni-takvoorsitter, beoog die organisasie om vanjaar landwyd meer as 3 000 bome te plant.
“Deur inheemse bome te plant bewaar ons nie net ons omgewing en maak dit ’n mooier plek om in te bly nie, maar ons wys ook dat ons hoop vir die toekoms het. Bome is veel meer as bloot ’n belangrike deel van die ekostelsel of ’n noodsaaklike natuurlike hulpbron – bome is simbolies van lewe,” sê Mouyis.
AfriForum fokus jaarliks op sowel ’n boomspesie wat algemeen voorkom as ’n skaars boomspesie. Die algemene boom vir 2019 is die maroela (Sclerocarya birrea), terwyl die skaars boom die appelblaar (Philenoptera violacea) is. AfriForum moedig dorpe aan om inheemse bome te plant wat in hul omgewings aard.
“Boomplantmaand bied die perfekte geleentheid om ’n blywende verskil in ons gemeenskappe te maak. Bome het egter deurlopende sorg nodig om tot voordeel van almal te floreer en Willowmoore High onderneem om hierdie sorg te verskaf. Dit is simbolies daarvan dat ons hier is om te bly en hoop vir die toekoms het,” sê Lily Oberholzer, onderwyser by Willowmoore High.
Stuur ’n e-pos aan marie.naude@antiek.afriforum.co.za om by jou plaaslike AfriForum tak in die Oos-Rand se omgewingsakeportefeulje betrokke te raak.
